PN-BESI-TL ho Parseiru Realiza Dialogu BESI hanesan Direitus Umanus iha Munisípiu Ermera

Objetivu husi Sorumutu ida ne’e mak atu Fahe Informasaun kona-ba Bee, Saneamentu no Ijiene hanesan Direitus Umanus no Fahe Lisaun Aprendida kona-ba Kartaun Pontuasaun Komunidade ho nia feramentu sira ne’ebe bele kontribui ba melloramentu dezenvolvimentu setór Bee, Saneamentu no Ijiene iha komunidade ba Autoridade Munisipál, Postu, Suku no mós Organizasaun Sosiedade Sivíl sira iha munisípiu Ermera, iha tempu hanesan, atu hasa’e mós kompriensaun no apoiu dezenvolvimentu polítika no desizaun sira iha nivel munisípiu kona-ba setór Bee, Saneamentu no Ijiene.

Sesaun Fahe Informasaun iha Sorumutu ida ne’e aprezenta husi 10 Vise-Diretór Asosiasaun HAK kona-ba Bee nudár Direitus Umanus ho nia Enkuadramentu Legál sira; no SPAO WaterAid Timor-Leste aprezenta kona-ba Introdusaun no Lala’ok Kartaun Pontuasaun Komunidade (KPK) ho nia feramentu sira.

Enkuantu, sesaun Fahe Lisaun Aprendida kona-ba utiliza Kartaun Pontuasaun Komunidade (KPK) ho nia atinjimentu sira aprezenta husi Diretór SMASA husi munisípiu Likisa no Manufahi, no Xefe Suku Loidahar husi munisípiu Likisa.

Prezidente Konsellu Fiskál PN-BESI-TL iha nia intervensaun dahuluk hateten, Plataforma Nasionál Bee, Saneamentu no Ijiene Timor-Leste ho nia membru organizasaun sira liu husi servisu hamutuk ho parseiru sira tantu nasionál no internasionál, inklui governu Timor-Leste liu husi Gabinete Apoiu Sosiedade Sivíl (GASC-V.PM) hodi hala’o programa sira no intervensaun iha territóriu tomak. Programa sira ne’ebe implementa mak oinsá atu haforsa servisu advokasia iha setór Bee, Saneamentu no Ijiene nia integrasaun ba Igualdade Jéneru, Defisiénsia, Inkluzaun Sosiál no mos Alterasaun Klimátika iha Timor-Leste.

Nia mós hateten, asesu ba Bee Moos, Saneamentu no Ijiene ne’ebe adekuadu, seguru, asesivel, inkluzivu no sustentável hanesan elementu vital ida ne’ebe importante tebes ba dezenvolvimentu. Maske nune’e, ita-nia situasaun atuál hatudu Bee moos, Saneamentu no Ijiene kontinua sai problema boot liu-liu iha fasilidade sira públiku sira hanesan eskola, postu no sentru saúde, merkadu no mós fatin turizmu sira.

Reprezentante Country Director WaterAid Timor-Leste iha nia intervensaun hateten WaterAid hanesan organizasaun naun governamental international ida ne’ebe mak hetan suporta husi komunidade Australia, no nia prezensa iha Timor-Leste kuaze besik tinan 20. WaterAid Timor-Leste durante ne’e halo nia intervensaun iha munisípiu Likisa no Manufahi ho nia foku boot liu mak Bee, Saneamentu no ijiene. Enkuantu, foin lalais ami hanoin atu integra tan asuntu esensiál sira seluk mak hanesan mudansa klimátika no GEDSI ne’ebe ko’alia kona-ba Jéneru, Defisiénsia no inkluzaun sosiál.

Nia hatutan, WaterAid Timor-Leste nia aprosimasaun barak liu ba iha Haforsa setór no mos apoiu servisu advokasia sira, iha ne’ebe ami servisu barak liu ho Asosiasaun HAK no PN-BESI-TL. Uluk WaterAid mós servisu hamutuk ho maluk defisiensia sira liu husi RHTO hodi ko’alia kona ba asuntu asesu ba BESI ne’ebe adekuadu no labele husik ema ida iha kotuk, liu husi konvoka diskusaun sira iha nível altu hodi tau importánsia ba BESI ne’ebe mak inkluzivu.

Nia mós hatutan liu tán katak apoiu sira ne’e hotu, WaterAid servisu hamutuk ho parseiru implementadór sira, ita konvoka mós diskusaun iha komunidade hodi rona sira-nia aspirasaun, hanoin kona-ba oinsa sira-nia asesu ba fornesimentu fasilidade sira no sentimentu sai na’in, liu husi mekanizmu Kartaun Pontuasaun Komunidade.

Iha okaziaun ida ne’e, Reprezentante Prezidente Autoridade Munisípiu Ermera, Diretór Apoiu NGO no Organizasaun Komunitariu iha nia intervensaun no abertura hateten, Ita hotu mak prezensa iha ne’e mai ho misaun ida de’it mak atu liberta povu husi kiak no mukit, tantu Governu, NGO nasionál no internasionál, Governu Munisípiu no Sosiedade Sivíl, ita mai ho hanoin ida de’it mak atu liberta povu nia terus no susar sira, liu-liu liga ba programa Bee moos. Nia hatutan Se laiha Bee sei la iha moris. Tan ne’e, Bee sai hanesan fatór determinante ba ema nia moris. Ho ida ne’e, husu ba ita-boot sira, ita hotu-hotu servisu koletivu, servisu hamutuk fó liman ba malu hodi kore povu nia kiak no mukit sira liu husi programa Bee, Saneamentu no Ijiene tanba ida ne’e hanesan fatór determinante iha nasaun ida nia moris.

Nia hatutan, ita hotu-hotu iha devér morál atu bele enkoraja komunidade, liu-liu sosiedade sivíl nia prezensa iha komunidade atu eduka ita-nia povu sira, sosializa programa sira ne’e ba komunidade atu iha konsiénsia no sente sai na’in. Ho ida ne’e, ita iha misaun no objetivu ida atu sosializa no eduka povu hatene utiliza bee ho kuidadu tanba agora dadaun ita mós tama ona ba iha mudansa klimátika no ida ne’e importante tebes.

Nia mós salienta liu tan, husu mós ba ita hotu mak prezensa iha ne’e liu-liu xefe suku sira, diretór SMASA nain rua husi Likisa no Manufahi nia prezensa iha ne’e atu fahe hamutuk ita-nia problema no hanoin sira atu tau hamutuk oinsá ita bele dezenvolve rai ida ne’e, Espesifikamente iha munisípiu Ermera. Tan ne’e, husu ba partisipante sira atu tuir atividade ida ne’e ho boa vontade, aproveita didi’ak rona informasaun sira atu nune’e programa sira ne’e ita bele implementa iha ita-nia munisipiu ida ne’e.

Iha sorumutu workshop ida ne’e, iha mós aprezentasaun husi Diretór SMASA munisípiu Ermera no Xefe Suku Lauala kona-ba situasaun jerál ba asesu bee moos no saneamentu iha munisípiu Ermera, no Reprezentante Organizasaun Sosiedade Sivíl ne’ebe reprezenta husi organizasaun TILOFE hodi ko’alia kona-ba servisu organizasaun nian ne’ebe kontribui mós ba dezenvolvimentu setór bee no mudansa klimátika liu husi Konservasaun bee matan sira.

Partisipa iha workshop ida ne’e mak Diretór Apoiu NGO no Organizasaun Komunitária ne’ebé reprezenta Prezidente Autoridade Munisípiu Ermera, Reprezentante Prezidente CCLN munisípiu Ermera, Reprezentante Amu Paroquia Ermera, Reprezentante Administradór Postu neen (6) iha munisípiu Ermera, Diretór SMASA munisípiu Ermera, Diretór SMASA munisípiu Likisa, Diretór SMASA munisípiu Manufahi, Xefe Suku Loidahar, PNDS munisípiu Ermera, Koordenadór BTL.EP munisípiu Ermera, Organizasaun Sosiedade Sivíl iha munisípiu Ermera, Diresaun Agrikultura, Diresaun Ambientál, Autoridade Lokál sira hanesan Xefe Suku sira ho nia reprezentante, CARE Internasionál iha Timor-Leste, Pontu Fokál FONGTIL munisípiu Ermera, Estudante Eskola Sekundária Jerál Nino Konis Santana, Estudante ETCI, WaterAid Timor-Leste, Asosiasaun HAK no mós Grupu Feto Foinsa’e Timor Lorosa’e.